„Paartherapie met Trennung“
noh Johann König
Op Platt: Franz Firla, 2023
Ick woar ouk ees met op em Paartherapie, mhm, en inzig Mol woar ick met, nujo, ick had wat Tied, - un ick we-it no‘h chenau wie dat woar.
Ick ssoat do un woar op minnen Handy am daddele, un dä Therapeut froochden: „Hallo, warum sind Sie hier?“ Un ick häpp föar öm chessaach: „Och, jo, Spaaß mutt sin!“ Jo, un do heet he chessaach, ick ssall dat Ding mol wegleage, un dann heet he me-i noch ees chefrooch: „Warum sind Sie hier? Mal ganz im Ernst, versuchen Sie mal – heet he chessaach – versuchen Sie mal für die Paartherapie eine Zielformulierung, - versuchen Sie mal ein Ziel fürs nächste Jahr zu formulieren!“ heet he chessaach, un ick häpp öwwerlaach: dat Ziel föart nöhste Johr? Un dann häpp ick öm chessaach: „Dat Ziel föar’t nöhste Johr ös op jeden Fall wi-er die direkte Champions-League-Qualifikation.“ Mhm! Un ick häpp soa chelaach donoh! Soa reechtig befre-it häpp ick chelaach. Do sseet min Öilsche: „Dä interessiert sech bloas föar Football, nee föar me-i!“ Und dä Therapeut keek me-i aan un me-inden: „Cool! Welcher Verein?“ Do häpp chessach: „Woar Spaaß! Merr dat Ziel, dat Ziel föar us twea , dat ös, dat we-i us langfristig e-ifach charnee meah vermisse doon.“ Mhm! Ick häpp wi-er soa laache mööte - ees Inzigen - merr wann kasse dat vandaach noch! – Un dann heet dä Therapeut min Öilsche chebee-e noh buuten te chohn, nä, nä, nee weil se soa nerve deat, he woul, wenn ick all do wöar, ouk ees met me-i alle-in kalle.
Un do heet he me-i chefrooch: „Was machen Sie eigentlich, wenn ihre Frau nicht Zuhause ist? Achtung! Wichtig ist, dass Sie vor der Antwort nochmal überlegen, wie fühlt man sich und wie verhält man sich alleine im gemeinsamen Zuhause. Stellen Sie sich vor, die Kinder sind nicht da und Ihre Frau ist 6 Stunden in Folge aus dem Hause. Wie fühlen sich und was machen Sie dann?“
Drop ick: „Wenn die ssääs Stoune sseecher fott ös? Wat ick dann maake? Nujo, häpp ick chessaach, ick mack natürlech bloas Ssaakes, die se nee lie-e kann, dat ös waal kloor, aals aunere mack ke-inen Ssinn. Ick eete tum Be-ispeel - häpp ick öm vertellt - met däm Leepel, met däm chroate Leepel eet ick tum Be-ispeel dat Vanille-Iis treck uut dä chroate Plastikdoas, ick chohn met däm chroate Leepel treck in die chroate Doas Vanille-Iis erinn, oahne Ömwääge öwwer kle-ine Schöttelkes off soan Bohe-i, dän se do ömmer dröm mack, dat bruuk ek nee! Ick choon treck in die chroate Doas, chemäcklich, un do fahr ick met däm chroate Leepel easmol langes dän Raund, do wo dat tueas we-ik ös, do treck ick dän Leepel lang, bös he voll ös und wenn ick dat doon, lech ick dobe-i in de Badewann, trink roa Wien un rook en Joint.“ Un do sseet he: „Cool, mach ich auch immer!“ „Merr vöarher“, ssäch ick, vöarher leeg ick noch em Paar schmeerige Ssöcken op dän Köökendeesch. Un he sset: „Warum denn das?“ Un ick: „Jo, do össe fies vöar.“ Un he drop: „Komische Frau!“ Nujo, wat ssoul ick dotu noch ssegge?
He heet me-i dann am E-in äwwer donno‘h in de Pleech chenohme, mhm, un he heet chessach, ick ssalden do‘ wat meah doone. Ick mööt ömmer wi-er verssööke, met kle-ine Ssaakes, met kle-ine Nohrechte, met kle-ine Cheschenke, ick möößden in usen Tessaamenleewen ömmer wi-er verssööke, öar die Wäätschätzung aantu…“gedeihen“, die öar e-ifach jo ouk „zugedeiht“. Wat en Driet!
Merr ick häpp dat verssöök met soan verdre-ihde kle-in Nohrech. Mhm! Se heet dat äwwer komplett in dän falschen Hals chekreegen. Ick woar wi-er op Montaasch, do häpp ick öar en Nohreech cheschreewen, en kle-in Nohreech, e-ifach, wat me-i infalle dead. Ek häpp cheschreewen: Hallo, min Leewerlingsken, ick vermess de-i total, ick mutt ömmer aan de-i dinke, ick freu me-i mega op us Wi-erssehn! Köösken!
Twea Minütte later schriew se teröck: Föar wat föarn Schlampe woar die Nohreech denn chedaach?
Jo, wat sall me dodrop sseggen?
Min Öilsche heet me-i dann vöarcheschloon, dat we-i‘t mol domit verssööke ssölle, un twar met en Trennung! Völl Lüüt in use Ömchewung sinn sech am trenne, un se het chessaach, et wöar e-ifach nee schöan, wenn we-i do buuten vöar bleewen deaden, be-i dä Flaarere-i öwer dat Thema nee rääch metquatere köine. Mhm! Un derweegen hadde se die Idee, dat we-i us trenne mööten, eas mol tur Probe sselfsverstainlich, un ouner de Vöarutsettung, dat min Inverstaindnis be-i dise Ssaake char ke-in Roll speele de-it.
Chutt, häpp ick dodrop chessaach, chutt ös dat nee; merr dou bös waal die Frou, chanz kloor, un eah dat ick me-i doadssuupe, maake we-i dat soa. Un dann häwwe we-i us herchessatt, un dann häwwe we-i bitts öwwerlaach, woröm we-i us trenne ssölle. We-i häwwe also iahrlich un intensief öwwerlaach, wat us be-im aunere werklich am aaler-, aalerme-is stöat, un dann sin we-i bitts im Chround faas techlicks dodrop chekohme: - - - Et sint de Ke-iner, wat us be-im aunere et me-is stöat, et sint in Wohrhe-it de Ke-iner. Mhm!
Wenn dä aunere jitz ke-im Pööste häd, wöar dat doch en chanz aunere Nummer, also im Chround häwwen we-i Frie-e un verstohn us chutt, sehr chutt, merr duar die Ke-iner …, jo, die Ke-iner häwwen ergeswie en Ki-el tüschen us chedreewen, un jo, dän kreege we-i jitz ouk neemeah aafchedreewen, un doröm häwwen we-i chessaach, okay, dann maaken we-i dat konsequent, we-i trenne us nou chanz offiziell wege dä Ke-iner, dat ös die Bechründung föar die Trennung: wege dä Ke-iner!
Völl maaken dat jo chenau aunersröm, völl sseggen jo: we-i bliewen tessaame wege dä Ke-iner. – Jo, wie dämlich kamme denn noch sinn?We-i trenne us wege dä Ke-iner, e-ifach domit die Ke-iner ouk metkreege, dat se us nee echal sint. Se chohn us bitts op’n Ssack un im Fall vanne Trennung chohn se bloas noch e-inen op dän Ssack. Nämlich dän, dä se chrad heet. Et ös ouk en chanz fairet Modell. Mhm! Däm Plan ös, die e-in Hälf vanne Tied sint de Ke-iner be-i öare Mooder, un die aunere Hälf vanne Tied sint die Ke-iner komplett be-i minner Mooder!
Mhm!
Mit freundlicher Genehmigung durch das Johann-König-Management per E-mail vom 11.05.23
Das Original von Johann König ist, wenn gewünscht, hier zu sehen:
